220. Mes’ele Zeyde hac farz olsa, hacca gitmeği mi evlâdır, yoksa sarf edeceği akça ile gayet muhtaç olan yere su götürmek mi evlâdır?
Cevap: Hacca gitmek farzdır.
221. Mes’ele Zeyd ganî olup bir defa hacc-i şerîf ettikten sonra Resûlullah (sallallâhu aleyhi ve sellem) vâki'asında görmek ile yine hacc-ı şerife gitmek istese, tekrar hacc-ı şerif etmek mi efdaldir, yoksa neylemek efdaldir?
Elcevap: Gayetle muztar olmuş sulehâ-i fukaraya, ve kemal mertebede muhtaç olan erâmü-i eytâma sarf etmek efdaldir. Tarîk-i hacda havf-i münkerât nakl olunur.
222. Mes’ele Zeyd, hacca kudret miktarı malı tahsil edip gitmek istedikte, Amr Zeyde "malı tezevvüce hare eyle, avretim boş olsun eğer tezevvüc hacca gitmekten evlâ değilse" dediği mukabelede, Bekr dahi "avretim üç talâk boş olsun, eğer hacca varmak tezevvücden evlâ değil ise" dese kangısının avreti boş olur?
Elcevap: Zeyd şedîd-üş-şebak kimse olup, tezevvücü te'hîr ettiği takdirce fücura düşmek mütevakkı' ise, Bekrinki boştur. Asla devâ-i nikâhtan nesnesi olmayıp, tezevvüc ettiği takdirce dahi hüsn-i mu'âşeret mutasavver olmayıp, ve haccın fevâtı dahi gâlih bel mütehakkik ise, Amrın boştur. Hâli mültebis ise, ikisinin bile boşluğa hükm olunmaz. Madem ki sözlerinin üzerine musir olalar.
223. Mes’ele Zeyd Amra "benim için hac ediversin" deyu üç bin akça vasiyet eylese...
224. Mes’ele Zeydin helâl akçası olmayıp, Amrın helâl akçasıyla istibdâl edip hacca gitmek caiz olur mu?
Cevap: Amrdan karz alıp sonradan vericek olur.
225. Mes’ele Hind li-ebeveyn kardeşi Amr ile, zevci Bekr izinsiz hacca gitmeğe kadire olur mu?
Cevap: Hac farz ise olur.
226. Mes’ele Âl-i Resulden olup hacc-ül-haremeyn olan Zeyde, Amr "bre kelp, hac eylemek ile merteben ziyâde mi oldu sanırsın, bir merkep dahi varır Mekkeye" dese Amra ne lâzım olur?
Elcevap: Re'y-i hâkimle ta'zir olunur.
227. Mes’ele Zebh olunacak hayvanın, zebh olunmalı oldukta, kaç ayağı bağlanıp kangısı boş kalmak caiz olur?
Elcevap: Üç ayağı bağlanıp, kıç ayağının sağı boş konup sol yanı üzerine yatırılır.
228. Mes’ele Zeyd kurban bayramında, fakir komşusu Amra kurban akçasını verse, üzerine lâzım olan kurban sakıt olur mu?
Elcevap: Caiz olmaz, meğer eyyâm-i nahir geçe, andan sonra caiz olur.
229. Mes’ele Zeydin rizâen lillâh olmayıp, belki garaz-i fâsid için ziyafet niyetine boğazladığı davar Allahu teâlâ hazretinin kelâm-ı şerifi tahtında dahil olup, haram olur mu?
Elcevap: Amrı ta'zîmen boğazlayıcak olur.
230. Mes’ele Zimmîler, bed-namlarında, kadîmden kurban ede gelmişler iken, ba'zı müslümanlar men' etmeğe kadir olur mu?
Elcevap: Kâfirin kurbanı meyyitedir hâkim men' etmeğe kadirdir.
